Ukraynanın “UA-Perşiy” Milli İctimai Televiziya Kanalı Ermənistan silahlı qüvvələrinin Azərbaycanın Tərtər şəhərinə raket hücumu barədə xüsusi reportaj yayımlayıb.

AZƏRTAC xəbər verir ki, telekanalın çəkiliş qrupu reportajda xüsusilə Ermənistan tərəfindən Tərtərdə Azərbaycanın dinc sakinlərinə qarşı fosforlu mərmilərdən istifadə edildiyini vurğulayıb. Tərtərdə partlamayan fosforlu mərmilərin Azərbaycan tərəfindən zərərsizləşdirildiyi diqqətə çatdırılıb.

Telekanalın jurnalisti vurğulayıb ki, Ermənistan bununla beynəlxalq konvensiyalarda qadağan olunmuş silahlardan istifadə edib.

Reportajda müharibə ilə əlaqədar Tərtər rayonundakı vəziyyətdən də söz açılıb.