Gürcüstanın aparıcı televiziya və radio kanalları, informasiya portalları Füzuli Beynəlxalq Hava Limanının açılış mərasimindən materiallar yayıblar.

AZƏRTAC xəbər verir ki, 1tv.ge televiziyası, AGFM radiosu, 24news.ge, interpress.ge, aktual.ge informasiya portallarında Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın Füzuli Beynəlxalq Hava Limanının açılışı mərasimdəki iştirakı barədə silsilə materiallar verilib.

Oxuculara Azərbaycan və gürcü dillərində təqdim olunan materiallarda Azərbaycan və Türkiyə prezidentlərinə Füzuli Beynəlxalq Hava Limanının rəmzi açarlarının təqdim olunması barədə məlumatlar yer alır.

Bundan başqa, Azərbaycan və Türkiyə prezidentlərinin Horadiz-Cəbrayıl-Zəngilan-Ağbənd avtomobil yolunun (Zəngəzur dəhlizi) təməlqoyma mərasimindəki iştirakları barədə materiallar da yerləşdirilib.