Azərbaycan tərəfindən Ukrayna xalqına humanitar yardım məqsədilə ərzaq məhsulları, məişət və tibbi sərfiyyat mallarından ibarət növbəti yardım iyulun 5-də göndərilib.

AZƏRTAC xəbər verir ki, ümumi çəkisi 50 ton olan humanitar yardımın Polşanın Varşava hava limanına çatdırılması üçün təyyarə saat 10:00-da Heydər Əliyev Beynəlxalq Aeroportundan yola düşüb.

Humanitar yardım Ukraynanın Çerkassı vilayət administrasiyasının tərəfdaş şəhərlər xətti ilə Sumqayıt Şəhər İcra Hakimiyyətinə etdiyi rəsmi müraciətlə əlaqədar hazırlanıb. Çerkassı şəhər əhalisinin ehtiyacları üçün nəzərdə tutulan humanitar yardıma saxlama müddəti uzun olan məhsullar (konservlər, dənli bitkilər, quru yemək payı və s.), eləcə də uşaq qidaları, dərman vasitələri və geyimlər daxildir.